நீங்கள் தேடியது "பாத யாத்திரை"

பழனி ஒரு புண்ணிய பூமி. சித்தர்கள் வாழ்ந்த இடம். அங்கு அழகும், இளமையும் கொண்ட தண்டாயுதபாணி என்ற முருகன் சிலையை மலை உச்சி மீது பதினெட்டு சித்தர்களின் ஒருவரான ‘போகர்’ என்ற சித்தர் பிரதிஷ்டை செய்துள்ளார்.

சங்க இலக்கியங்களில் முருகனின் முக்கியமான ஆலயங்கள் உள்ள இடங்கள் குறிப்பிடப்பட்டு உள்ளன. இதில் திருப்பரங்குன்றம், திருஆவினன்குடி, திருவேரகம், குன்றுதோறாடல், திருச்சீரலைவாய் மற்றும் பழமுதிர்சோலை போன்றவை. இவற்றில் நினைப்பவர்க்கு ஆராத முக்தி தரும் தலம், தமிழ் இலக்கியங்களில் சித்தன் வாழ்வு என சிறப்பு பெயர் பெற்றது பழனி. மிக்க அழகுடைய தங்க தேர், தங்கமயில் வாகனம் ஆகியவை உள்ள தலமாகும்.

தேவர்களை துன்புறுத்தி வந்த சூரனை அழித்து. கிரவுஞ்சி மலையையும், தனது வேலினால் உடைத்து தேவர்களை முருகன் காப்பாற்றினார். அந்த வெற்றியை கொண்டாட இந்திரன் தனது மகளான தெய்வானையை முருகனுக்கு மணமுடித்து தந்தார். அதற்கு பின்னரே முருகன் வாழ்வில் வள்ளி வந்தார்.

அகத்தியர், போகர், அவ்வையார், அருணகிரிநாதர், நக்கீரர், வள்ளலார் உள்ளிட்ட பல மகான்கள் முருகனிடம் நிறைவு தீட்சை பெற்று மரணமில்லா பெருவாழ்வு எய்தினர். கற்பூரம் கரைவது போல் தன்னை வேறொரு பரிணாமத்திற்கு மாற்றிக் கொண்டு பிரபஞ்சம் எங்கும் வியாபிக்க வேண்டும் என்பது நிறைவான செய்தி. அதை அவரே நிரூபித்து காட்டியதால் பெம்மான் முருகன் பிறவான், இறவான் என்று அருணகிரிநாதரால் பாட பெற்றார்.

பாத யாத்திரை என்ற நடைபயணம் அதில் ஒரு மார்க்கம். கடவுளின் அருளை பெறுவதற்காக பாதயாத்திரை செல்கின்றனர். தங்கள் வாழ்க்கையில் பல பிரச்சினைகள் உள்ளன. முருகப்பெருமானை வணங்குவதன் மூலம் தங்களுக்கு ஏற்பட்டுள்ள கஷ்டங்களை அவர் களைந்து விடுவார் என்ற நம்பிக்கையின் அடிப்படையில் கலியுக வரதன் என்ற கந்தனை மக்கள் வணங்கி செல்கின்றனர். மேலும் பாத யாத்திரையின்போது ஏற்படும் மனஉறுதி உடலுக்கும் வலிமை சேர்கிறது.

மனிதனின் உலக பற்று மீதான அபரிமிதமான ஆசைகளை விலக்கி அமைதியான, மகிழ்ச்சியான தெய்வீக தன்மையுடன் கூடிய வாழ்வை பெற பக்தர்கள் பாத யாத்திரையை மேற்கொள்கின்றனர். ஒரு மனிதன் நற்பண்புகளை பெற்று தெய்வ பக்தி பெற பாதயாத்திரை வழிவகை செய்கின்றது. குறிப்பாக கிராமங்களில் ஒற்றுமையுடன் கூடிய சமூக வாழ்க்கையை கடைபிடிக்க இது பெரிதும் உதவுகிறது. நிலையற்றதே இந்த வாழ்க்கை என்ற தத்துவத்தை புரிந்து கொள்ள உதவுகின்றது. 

தமிழ்நாட்டில் எந்த கோவிலுக்கும் இல்லாத ஒரு சிறப்பு பழனி முருகன் கோவிலுக்கு உண்டு. அது பழனிக்கு படையெடுத்து வரும் பக்தர்களின் கட்டுக்கடங்காத பாத யாத்திரை கூட்டம்.

தைப்பூசம் சீசனில் பழனி நோக்கி தமிழ்நாட்டின் பல பகுதிகளில் இருந்தும் பக்தர்கள் நடந்தே சென்று முருகனை வழிபடுகிறார்கள். பெயர் தான் தைப்பூசமே தவிர... மார்கழி தொடக்கத்தில் இருந்தே பக்தர்கள் சாரை, சாரையாக பழனிக்கு வரத் தொடங்கி விடுகிறார் கள்.

உலகம் புகழும் இந்த பாத யாத்திரை பழக்கத்தை ஏற்படுத்தியவர்கள் நகரத்தார்கள் ஆகும். பல நூறு ஆண்டுகளுக்கு முன்பு நகரத்தார்கள் பழனி கோவிலுக்கு நடந்து வருவதை சில நடைமுறைகளுக்காக கடைபிடித்தனர்.

பாதயாத்திரை வரும்போது ஒவ்வொரு குடும்பத்தினரும் எப்படி நடந்து கொள்கிறார்கள் என்பதை கவனிப்பார்கள். அதை வைத்து அந்த குடும்பத்தினருடன் திருமண சம்பந்தம் பேசி முடிப்பார்கள். நாளடைவில் இந்த பாதயாத்திரை வழக்கம் தமிழர்கள் அனைவரிடமும் பரவி விட்டது. பாத யாத்திரையின் போது காவடி ஏந்தி செல்வதும், அலகு குத்தி தேர் இழுத்து செல்வதும் முக்கிய அம்சம்.

நோய் தீர வேண்டும். நல்ல வரன் கிடைக்க வேண்டும். வியாபாரம் செழிக்க வேண்டும். குடும்பத்தில் பிரச்சினை தீர வேண்டும் என்று லட்சக்கணக்கானவர்கள் ஆண்டு தோறும் பழனி முருகனை நாடி, நடந்தே வருகிறார்கள். சமீப காலமாக சென்னையில் இருந்தும், கேரளாவில் இருந்தும் பழனிக்கு பாத யாத்திரை செல்லும் பக்தர்கள் எண்ணிக்கை அதிகரித்தப்படி உள்ளது.

தைப்பூசம் சீசனில் தங்கள் பூர்வீக ஊரில் இருந்து பழனிக்கு நடந்து செல்ல வேண்டும் என்பதற்காகவே அமெரிக்கா, சிங்கப்பூர் உள்பட பல வெளிநாடுகளில் இருந்தும் ஒவ்வொரு ஆண்டும் தவறாமல் வருவதை தமிழர்கள் வழக்கத்தில் வைத்துள்ளனர். இந்த சிறப்பால் அறுபடை வீடுகளில் பழனி திருத்தலம் தனித்துவம் பெற்றுத் திகழ்கிறது.

கடந்த 10 ஆண்டுகளாக திருச்செந்தூர் முருகன் தலத்துக்கும் பாத யாத்திரை செல்லும் பக்தர்கள் எண்ணிக்கை அதிகரித்துள்ளது. கோவில்பட்டி, விளாத்திக்குளம், அருப்புக்கோட்டை, நாகர்கோவில், திசையன்விளை, ஆலங்குளம், தென்காசி, கடையநல்லூர், செங்கோட்டை பகுதியில் இருந்து பல்லாயிரக்கணக்கானவர்கள் திருச்செந்தூருக்கு பாதயாத்திரையாக சென்று முருகனை வழிபடுகிறார்கள்.